السلام عليكم
بعض الصيادين وخاصه اصحاب الصيد بلخيط ماعندهم فكره عن الصيد بشباك وانا اليوم حبيت ابين بعض اسرار تركيب الشباك وكيفيه تركيب الشباك حسب نوع الصيد ونوعه يعنى لكل سمكه تركيب معين وشبك معين حسب عمق البحر وحسب حجم السمك .
تركيب الالياخ فيها حسابات دقيقه ولكل صياد حسابات وهيه مثل السر وانا اليوم راح احاول اكشف لكم بعض الاسرار ولى عنده معلومات يضيفها وكل واحد وخبرته واكيد فى ناس عندها خبره فى صيد بعض الاسماك .
طبعا قياس الالياخ بحجم فتحاته ويكون بلدراع يعنى تمسك الليخ بيدك وتحسب كم فتحه في دراعك ولو كانت 7 فتحات يكون الليخ سباعى ولو 12 فتحه يكون اثنى عشرى يعنى كل ما قلت الفتحات على دراعك يعنى الفتحه اكبر ولما تروح تشترى ليخ راح يقولك صاحب المحل عندى ستعشرى وفيه 70 عين راح يكون طوله ثلاثه ابواع يعنى فى كل دراع 16عين وراح يكون طول عرض الليخ ثلاثه ابواع الا شوى ولو كان سباعى راح يقولك فيه اقل فتحات لنها اكبر ونفس العرض ولكن تختلف عدد الفتحات والحين راح نتكلم عن الانواع بعد ما تكلمنا بختصار عن شرح قياس الليخ وطبعا تختلف مسميات الاحجام فى كل مناطق الخليج ولزم نعرف انه فى كل باع تكون فيه عند تركيب الليخ فى االحبل شررياه اللليخ بلحبل حتى الليخ ما يروح علىالبويه او الوزن وفيه ناس تشد عشر فتحات وبعدها ترخى عدد من الفتاح حتى لما ترمى الليخ فى الماى ما تتغازل الفتحات وتتسكر من اثر التيارات وهذى بعد تعتبر اسرار من اسرار التركيب وى شخص حاب يركب غزل يطرح موضوع عن نوعالسمك ونوعالصيد وان شاء اللهنقدر نساعده لنه صعب الشرح عن كل سمكه وكل نوع من السمك فى الموووضع
الاشياء المطلوبه فى تركيب الغزل
1_بويه بحجامها حسب طول الليخ ونوع الاستخذام هل هو تغويص او تهيل او حلاق
2_ديول يعنى مسو يعنى وزن يوضع فى الليخ حتى يروح القووع او حبل الرصاص
3_حبل عادى ويكون قياس الحبل حسب نوع التركيب وقياس الحبل بلملى واختيار الحبل حسب نوع الصيد ونوع الليخ .
طبعها انواع الشباك
النايلون : مصنوع من خيوط النايلون وهو يعتبر من اخطرها واصيدها لنه يكون بدون لون تحت الماى وفيه ميزه انه يلف على السمكه لنه ما يشرب ماى ويكون خفيف تحت الماى ويكون بجيمع الفتحات.
البريسم :يعنى ويسمى الكويتى ويكون شكله على شكل اهذاب على شكل خيط ولما يكون فى الماى تتفارق الخيوط عن بعض وراح تكون اسهل فى القبض على السمك واكثر استخذامه فى صيد البياح لكبار والشعم والحمام فى التركيز ويكون عشارى و13 و 12يكون فى صيد البدح والصافى وهو ما يستخذم فى القلص او الاماكن الى فيها شيت او رماى او حصا لنه بسرعه يشبك بلحصا وصعب اعاده تصليحه
الغزل العادى ويكون خيط القطن وهو الليخ العادى ويختلف بحجم الفتحات وحجم الخيط وهو يستخذم فى كل انواع السمك وهو سهل التركيب وسهل التصليح
طريقه تركيب التركيز وافضل طرق لصيد فيه وانواع الاسماك
1_التدمير
اكثر استخدام النايلون والبريسم فى التدمير يعنى التركيز يعنى التغويص معناهم انك تخلى الليخ يغوص الى القاع ويكون عرض الليخ ما يزيد عن باعين وطريقه تركيب الغز ل
اول شى راح نختار نوع الحبل ونوع البويه وحجم الخيط اللى راح نستخذمه.
بويه قد قبضه اليد
حبل رصاص فوق 7 ملى
حبل الليخ لزم يكون 9 ملى مكان تركيب البويه
حجم الخيط راح ناخذ مثال من خيط 25 الى 50 وكل ما زدت عن 25 كل ما صار الخيط اسمك وامتن مثل خيوط الحداق
طبعا كل ما زاد الغزر يفضل يكون الحبل اسمك وانا انصح 9 ملى والسبب حتى تقدر ترفع اللليخ بسهوله لنك راح تسحبه من القووع وراح تحكم مسكه الليخ ومراح يتعبك عكس الحبل الضعيف وراح تكون بين كل بويه وبويه باعين وحجم البويه يكون قد قبضه اليد يعنى تقدر تمسكها وماتكون اكبر وكل ما كانت اكبر حاول تباعد بينهم حتى تقدر تخلى الليخ يغوص واما عن الوزن فى كل باع مسو (ديول) ولو كان حبل رصاص ينصح بسبعه ملى وفووق حتى يروح القووع .
وتستخذم هذى الطريقه فى صيد الحمام والصافى والبدح والحمام و القبقوب بختصار الاسماك التى ترعا فى القاع ان كانت المياه العميقه او الضحله
2_الحلاق والهيال طريتقهم قريبه من بعض
يكون فيها الغزل من القاع الى السطح بحيث انك تخلى الليخ يحاصر السمك من كل اتجاه وولز تاخذ اشياء مهمه اول شى سرعه رمى الشبك لنك ثانى شى عمق البحر قبل لا ترمى الليخ ثالث شى حجم السمك يعنى لزم تحدد حجم السمك والعمق قبل لا تروح تصيد
راح نتكلم عن تركب الغزل بدون ذكر نوع حجم الفتحه لنك لازم تعرف انه كل ماكانت السمكه اكبر كل ما كان الخيط اسمك والفتحه اكبر
والتركيب لزم يكون بين كل بويه وبويه باع وبين كل وزن وزن باع ويكون الحجم العادى اكبر من قبضه اليد بشويه وهذى القياسات راح تتعلمها بعد ما تركب كم لليخ ويفضل الوزن يكون حبل رصاص حتى تحلق على السمجه بسرعه ويستخدم فى صيد البياح والخباط والشعم والقفدار والدردمان والقرفا والقباب يعنى كل انواعالسمك اللى تقدر تشوفه على سطح البحر او فى الاماكن الضحله
موضوع: «ஜ» اسرار تركيب الغزل (شباك الصيد) «ஜ» 
الثلاثاء 03 يناير 2012, 4:59 am